নিউজ ব্যুৰ’,নগাঁও,১৮অক্টোবৰ:–অসমীয়া সাহিত্য জগতৰ এগৰাকী প্ৰথিতযশা সাহিত্যিক তথা লেখক-গৱেষক,সমালোচক,গল্পকাৰ-ঔপন্যাসিক ড°গোবিন্দ প্ৰসাদ শৰ্মাৰ নৱতম গ্ৰন্থ “অসমীয়া উপন্যাসৰ অধ্যয়ন”ৰ বুধবাৰে শুভ উন্মোচন কৰা হয় ।
প্ৰজ্ঞা মিডিয়াহাইপে প্ৰকাশ কৰি উলিওৱা গ্ৰন্থখনিৰ উন্মোচনী অনুষ্ঠানটিত গুৱাহাটী বিশ্ববিদ্যালয়ৰ ইংৰাজী বিভাগৰ অধ্যাপক ড°প্ৰদীপ্ত বৰগোহাঁঞিকে ধৰি গুৱাহাটী বিশ্ববিদ্যালয়ৰ অসমীয়া বিভাগৰ অধ্যাপক ড° উপেন ৰাভা হাকাচাম, কটন বিশ্ববিদ্যালয়ৰ অসমীয়া বিভাগৰ অধ্যাপক ড° মহেশ্বৰ কলিতা আৰু বিশিষ্ট লেখক-সমালোচক জ্যোতি খাটনিয়াৰে বিশিষ্ট অতিথি হিচাপে অংশগ্ৰহণ কৰে। এই উপলক্ষে গুৱাহাটী প্ৰেছ ক্লাবত আয়োজিত গ্ৰন্থ উন্মোচনী অনুষ্ঠানটিত গুৱাহাটী বিশ্ববিদ্যালয়ত অধ্যাপনা কৰা কালত ড°শৰ্মাক জনাৰ সৌভাগ্য লাভ কৰা ড° প্ৰদীপ্ত বৰগোহাঁঞিয়ে ড° শৰ্মাক নিজৰ অভিভাৱক স্বৰূপ বুলি উল্লেখ কৰি কয় যে ড° শৰ্মা এগৰাকী নীৰৱ সাধক আৰু তেওঁ অদ্যাপি প্ৰাপ্য সন্মানৰ পৰা বঞ্চিত হৈ থকা বুলি তেওঁ অনুভৱ কৰে। ড° বৰগোহাঁঞিয়ে সাহিত্য আৰু শিক্ষাজগতত ড° শৰ্মাৰ লিখনিৰ গভীৰ প্ৰভাৱৰ বিষয়ে আলোকপাত কৰে। ড° বৰগোঁহাঞিয়ে লগতে ড° গোবিন্দ প্ৰসাদ শৰ্মাৰ “অসমীয়া উপন্যাসৰ অধ্যয়ন” গ্ৰন্থখনি নিঃসন্দেহে অসমীয়া ভাষাৰ শিক্ষাৰ্থী আৰু লেখকসকলৰ বাবে এক মূল্যৱান সম্পদ হ’ব বুলি উল্লেখ কৰে ।
অনুষ্ঠানত আন বিশিষ্ট অতিথিসকলৰ ভিতৰত ড° উপেন ৰাভা হাকাচামে ড° শৰ্মাৰ কাম আৰু ই কেনেদৰে শৈক্ষিক দৃশ্যপট সমৃদ্ধ কৰিছে সেই সন্দৰ্ভত বক্তব্য ৰাখে। কটন বিশ্ববিদ্যালয়ৰ অসমীয়া বিভাগৰ অধ্যাপক ড° মহেশ্বৰ কলিতাই ড° গোবিন্দ প্ৰসাদ শৰ্মাৰ গ্ৰন্থখনে ছাত্ৰ-ছাত্ৰীসকলৰ লগতে সকলো সাহিত্যপ্ৰেমীক উপন্যাসৰ অধ্যয়নক নতুন দৃষ্টিৰে চাবলৈ শিকাব বুলি কোৱাৰ লগতে কয় যে গ্ৰন্থখন অসমীয়া সমালোচনা সাহিত্যলৈ এইখন এক গুৰুত্বপূৰ্ণ অৱদান। অনুষ্ঠানত লেখক-সমালোচক জ্যোতি খাটনিয়াৰে ভাষণ প্ৰসংগত আধুনিক অসমীয়া সাহিত্যলৈ ড° শৰ্মাৰ যি অৱদান আৰু ড° শৰ্মাৰ “অসমীয়া উপন্যাসৰ অধ্যয়ন” গ্ৰন্থখনৰ এক সম্যক আলোচনা দাঙি ধৰে।
তেওঁ কয় যে ড° শৰ্মাই পাশ্চাত্য সাহিত্যৰ সৈতে অসমীয়া উপন্যাসৰ তুলনামূলক বিশ্লেষণ কৰিছে,বিৰিঞ্চি কুমাৰ বৰুৱা,নৱকান্ত বৰুৱা,শীলভদ্ৰ আদি বিশিষ্ট লেখকসকলৰ কামৰ ওপৰত অন্তদৃষ্টিপূৰ্ণ দৃষ্টিভংগী আগবঢ়াইছে। উল্লেখ্য যে ড° গোবিন্দ প্ৰসাদ শৰ্মাৰ “অসমীয়া উপন্যাসৰ অধ্যয়ন”ত ১৩জন প্ৰখ্যাত ঔপন্যাসিকৰ সৃষ্টি যেনে “জীৱনৰ বাটত”,”পৃথিৱীৰ হাহি”, আদিৰ আলোচনা সন্নিৱিষ্ট কৰা হৈছে। গ্ৰন্থখন প্ৰকাশ কৰিছে প্ৰজ্ঞা মিডিয়াহাইপ পাব্লিকেচনৰ হৈ উজ্জ্বল বৰাই। গ্ৰন্থখনৰ মূল্য ২৫০ টকা ।
ঋতু পৰ্ণ শৰ্মা,নগাঁও
