জি আই টেগ লাভ কৰা গামোচাক অসন্মান, কলগাছিয়াত গামোচা পিন্ধি যুৱতীৰ ‘লুংগী ডাঞ্চ’
কেইদিনমান পূৰ্বে অসমীয়াৰ আৱেগ, অসমীয়াৰ স্বাভিমান গামোচাই লাভ কৰিছিল জি আই টেগ ৷ জি আই টেগ লাভ কৰা অসমীয়াৰ স্বাভিমান গামোচাখনক এইবাৰ চৰম অপমান কৰা দেখা গ’ল বৰপেটা জিলাৰ কলগাছিয়া থানাৰ অন্তৰ্গত বগুলামাৰীত ৷
বাণিজ্য মেলাৰ নামত অসমীয়া গামোচা পিন্ধি কৰা দৃষ্টিকটু, উন্মাদ নৃত্যই ব্যথিত কৰিছে বহুতকে ৷ বি কে এল চি যুৱ সমাজৰ উদ্যোগত আয়োজিত বাণিজ্য মেলাৰ সাংস্কৃতিক অনুষ্ঠানৰ ঘটনা এয়া ৷ মুকলি মঞ্চত এগৰাকী যুৱতীয়ে হিন্দী গীতত কৰা এই উদ্দাম নৃত্যই হতচকিত কৰিছে অসমৰ সচেতন ৰাইজক ৷
কলগাছিয়াৰ দৰে ঠাইত সাংস্কৃতিক সন্ধিয়াৰ নামত বেপৰোৱা অনুষ্ঠান আয়োজনৰ মূল উদ্দেশ্য আচলতে কি তাকো লৈ অৱতাৰণা হৈছে প্ৰশ্নৰ ৷ দূৰ-দূৰণিৰ পৰা ভাড়া কৰি অনা লোকৰ দ্বাৰা আয়োজিত এনে অনুষ্ঠান দুই এবাৰ এইখন অসমত নঘটা নহয়৷ পূৰ্বে ঘটা ঘটনাসমূহৰ পৰা শিক্ষা নোলোৱাটোহে উদ্বেগজনক হিচাপে বিবেচিত হৈছে ৷
কলগাছিয়াৰ এই ঘটনাৰ পিছতে প্ৰতিক্ৰিয়া প্ৰকাশ কৰিছে সৰুক্ষেত্ৰীৰ কংগ্ৰেছী বিধায়ক জাকিৰ হুছেইন শিকদাৰে। তেওঁ কয়- “এনেকুৱা যদি ঘটনা ঘটিছে সেয়া সঁচাকৈয়ে দুৰ্ভাগ্যজনক৷ আমাৰ সভ্যতা-সংস্কৃতিয়ে এইবোৰ কথা নকয় ৷ যিকোনো অনুষ্ঠান এটা পৰিয়ালে একেলগে উপভোগ কৰিব পৰা হ’ব লাগে ৷ গামোচাখনৰ সন্মান অক্ষুণ্ণ ৰখা আমাৰ সকলোৰে দায়িত্ব৷ যিকোনো অনুষ্ঠানতেই নগ্নতাৰ পয়োভৰ গ্ৰহণযোগ্য হ’বই নোৱাৰে ৷” বিষয়টোক লৈ উদ্বিগ্নতা প্ৰকাশ কৰিছে বিজেপি বিধায়ক ৰূপজ্যোতি কুৰ্মীয়েও ৷
