December 8, 2021

গুৱাহাটীৰ ৪ সমষ্টিৰ তথ্যসম্বলিত ৱেব প’র্টেল মুকলি

কামৰূপ মহানগৰ জিলাৰ ভোটাৰসকলে নির্বাচনত ভোটাধিকাৰ সাব্যস্ত কৰা সম্পর্কত স’ততে মুখামুখি হোৱা প্রশ্ণসমূহৰ সমাধানৰ উদ্দেশ্যে কামৰূপ মহানগৰ জিলাত শুভাৰম্ভ কৰা হৈছে এক ৱেব প’র্টেলৰ৷deokamrupmetro.in নামৰ ৱেব প’র্টেলটোৰ বুধবাৰে শুভাৰম্ভ কৰে জিলা উপায়ুক্ত বিশ্বজিৎ পেগুৱে৷ এই ৱেব প’র্টেলত উপলব্ধ কৰা হৈছে জালুকবাৰী, দিছপুৰ, পূব গুৱাহাটী আৰু পশ্চিম গুৱাহাটী– চাৰিওটা সমষ্টিৰে ভোটকেন্দ্র, বি এল অ’সকলৰ নাম, ফোন নম্বৰ আদি৷ এতিয়াৰে পৰা নিজৰ সমষ্টিৰ বি এল অ’সকলক ফোন নম্বৰত সংযোগ কৰি ভোটকেন্দ্রকে আদি কৰি সকলো তথ্য সহজতে জানি ল’ব পাৰিব ভোটাৰসকলে৷ আনকি দৃষ্টিহীনসকলেও শুনিব পৰাকৈ তথ্যসমূহৰ ‘অডিঅ’ উপলব্ধ কৰা হৈছে এই ৱেব প’র্টেলত৷ আনহাতে, দৈনিক এই ৱেব প’র্টেলটো আপডেট কৰিবলৈ ব্যৱস্থা গ্রহণ কৰা হৈছে৷ ৱেব প’র্টেলটো শুভাৰম্ভ কৰি উপায়ুক্ত বিশ্বজিৎ পেগুৱে কয় যে সাধাৰণতে ভোটাৰসকলৰ মনত ভোটদান সম্পর্কত বিভিন্ন প্রশ্ণৰ উদ্রেক হয়৷ সেই উত্তৰসমূহ যাতে সহজতে হাততে পায় সেই চিন্তাৰেই নির্বাচনৰ আগত আৰম্ভ কৰা হৈছে এই ৱেব প’র্টেলটো৷ উল্লেখ্য যে এই ৱেব প’র্টেলটো হৈছে নির্বাচন সম্পর্কত দৃষ্টিহীন ভোটাৰসকলক সহায় কৰিব পৰাকৈ প্রস্তুত কৰা অসমৰ প্রথমটো ৱেব প’র্টেল ৷

error: Content is protected !!
%d bloggers like this: