শহুৰেকক হেৰুৱাই শোকত ভাঙি পৰা বোৱাৰীয়েক কিংকিনীয়ে উচুপি উচুপি বাৰে বাৰে ক’লে মূৰৰ ওপৰৰ ছাদখন নাইকীয়া হোৱাৰ কথা৷
“দেউতা এনেকৈ আমাক এৰি গ’লগৈ৷ আমাৰ ভয় লাগিছে, ‘সিদ্ধাৰ্থ আৰু মই বৰ অকলশৰীয়া হৈ পৰিলো৷ ঘৰৰ মুৰব্বীজনেই নোহোৱা হ’ল৷ আমাৰ প্ৰত্যেক সিদ্ধান্ত দেউতাক সুধি লৈছিলো এতিয়া আমি কাক সুধিম? দেউতা বৰ সোনকালে গ’লগৈ,” কিংকিনীয়ে কয়।
ইপিনে পুত্র সিদ্ধার্থয়ো পিতৃক হেৰুৱাই মৰ্মাহত হৈ পৰিছে৷ পিতৃক ইমান সোনকালে বিদায় দিব লাগিব বুলি ভাৱিবই পৰা নাছিলো বুলি সিদ্ধাৰ্থই কয়।
“দেউতা বৰ সোনকালে গ’লগৈ৷ তেওঁৰ বৰ হেপাঁহ আছিল নিজে পৰিচালনা কৰা ডঃ বেজবৰুৱা-২ খন মুকলি হোৱাৰ দিনটোলৈ৷ দেউতাৰ সেই আশা পূৰণ নহ’ল৷ প্ৰতিমুহূৰ্ততে কাৰোবাক লগ পালেই তেওঁ ছবিখনৰ কথা কৈছিল৷ দেউতা হাস্পতালত থকা সময়খিনিত অসম চৰকাৰৰ যন্ত্ৰীবৰ্গই প্ৰতিসময়তে খবৰ ৰাখিছে৷ তাৰবাবে মই অসমৰ মুখ্যমন্ত্রী হিমন্ত বিশ্ব শৰ্মাক ধন্যবাদ জনাইছো। দেউতাক ৰাজ্যিক মর্যাদাৰে শেষ বিদায় জনাব জানি ভালপাইছো৷ অসম চৰকাৰক দেউতাক দিয়া এই সন্মানৰ বাবেও ধন্যবাদ,” সিদ্ধাৰ্থই কয়।
