December 7, 2021

আছু নহয়, অসমৰ জনগণে জন্ম দিছে অগপকঃ অতুল বৰা

Singer Kalpana Patowary formaly joined Asom Gana Parishad (AGP) in the presence of AGP president Atul Bora and working president Keshab Mahanta, in Guwahati on Friday.

নির্বাচনৰ দিন চমু চাপি অহাৰ লগে লগে বিৰোধী পক্ষৰ বিৰুদ্ধে অধিক আক্রমণাত্মক হৈ পৰিছে অসম গণ পৰিষদৰ সভাপতি অতুল বৰা৷ শুকুৰবাৰে জনপ্রিয় গায়িকা কল্পনা পাটোৱাৰীৰ যোগদান অনুষ্ঠানত সদৌ অসম ছাত্র সন্থাকো কঠোৰ সমালোচনা কৰে অগপ সভাপতিগৰাকীয়ে৷ তেওঁ কয়– ‘অসমৰ মাটিত অসম গণ পৰিষদ আঞ্চলিকতাবাদৰ এটা স্তম্ভ৷ ইয়াক উভালি পেলাবৰ বাবে বিভিন্ন শক্তিয়ে চেষ্টা চলাই আহিছে৷ আছুৰ মজিয়াত থকাৰ পৰা এয়া দেখি আহিছোঁ৷ অগপৰ ভিতৰত থাকিও দেখিছোঁ৷ কিন্তু অসম গণ পৰিষদ শক্তিশালী হোৱা মানেই আঞ্চলিকতাবাদ শক্তিশালী হোৱা আৰু আঞ্চলিকতাবাদ শক্তিশালী হোৱা মানেই অসম শক্তিশালী হোৱা৷ যেতিয়ালৈকে দলৰ প্রতিজন কর্মকর্তাই নিষ্ঠাৱান সৈনিকৰ দৰে কাম কৰি যাব, তেতিয়ালৈকে অগপক কোনেও দুর্বল কৰিব নোৱাৰিব৷ আমি দলক সেৱাৰ মাধ্যম হৈ হিচাপে লৈছোঁ আৰু যি কৰিছোঁ ৰাজ্যখনৰ ভালৰ বাবে কৰিছোঁ৷ আমাক বহুতেই সমালোচনা কৰে আৰু গঠনমূলক সমালোচনাক আন্তৰিকতাৰে গ্রহণ কৰোঁ৷ কিন্তু কিছুমান মানুহে ইচ্ছাকৃতভাৱে দলৰ বেয়া কৰিবলৈ সমালোচনা কৰে৷ এইসকল সমালোচকে কোনো কালে আঞ্চলিকতাবাদত বিশ্বাস কৰা নাই৷ তেওঁলোকৰ সেৱাৰ মনোবৃত্তি নাই৷ মই এইবিলাক লোকৰ সমালোচনা নুশুনো, নাচাওঁ৷ মতলব লৈ যিসকলে সমালোচনা কৰে, তেওঁলোকক আমি কোনো কাৰণতে গুৰুত্ব নিদিওঁ৷ তাৰ সলনি সাধাৰণ শ্রমিকৰ কথা মনোযোগেৰে শুনো৷ ষ্টুডি’ত বহাসকলৰ কথা এতিয়া সাধাৰণ মানুহেও বুজি পোৱা হ’ল যে আচলতে তেওঁলোকৰ মতলব কি? কেতিয়াবা আমিও তাৰ ব্যাখ্যা কৰিম৷’ নিজৰ ভাষণত অগপৰ সভাপতিগৰাকীয়ে লগতে কয়– ‘আছু আমাৰ মাতৃ সংগঠন৷ মাতৃ সংগঠন মানে আছুৱে অসম গণ পৰিষদক জন্ম দিয়া নাই৷ অসমৰ জনসাধাৰণে অগপক জন্ম দিছে৷ আছুৰ মই সভাপতি আছিলোঁ৷ আছুৰ মজিয়াখন ভাল হৈ থকাটো বিচাৰোঁ বাবেই কেতিয়াবা দুই–এটা কথা কওঁ৷ ইয়াত আমাৰ কোনো মতলব নাই৷ যিসকলে এইবিলাক কথা শুনিবলৈ বেয়া পায়, ডাঙৰ ডাঙৰ কথা ক’বলৈ ভাল পায়, তেওঁলোকৰ যে মতলব আছে, অসমৰ ৰাইজে সেই কথা অতি সোনকালে বুজি পাব৷’

অগপই পূর্বৰ ভুলৰ সংশোধন কৰি আত্মশুদ্ধিৰ বাটেৰে আগবাঢ়িছে বুলি মন্তব্য কৰি তেওঁ পুনৰ কয়– ‘পূর্বতে আমাৰ ভুল হৈছিল৷ সেই বাবেই ৰাইজে আমাক দূৰলৈ ঠেলি পঠিয়াইছিল৷ এতিয়া আমি আত্মশুদ্ধিৰ পথ লৈছোঁ৷ ৰাইজে বিচৰা ধৰণে সততা, নিষ্ঠাৰে কাম কৰি যাব বিচাৰিছোঁ৷ আমি বিচাৰিছোঁ আমাৰ দৃষ্টিভংগী বাস্তৱসন্মত হওক৷ কোন বাটেৰে গ’লে সমস্যাৰ সমাধান পাম, সেই বাটেৰে আগবাঢ়িব বিচাৰিছোঁ৷’ অতুল বৰাই অসম চুক্তিৰ ৬নং দফা ৰূপায়ণ, অসমীয়া ভাষাৰ সুৰক্ষা আৰু ভূমি পট্টা প্রদানৰ বাবে চৰকাৰে লোৱা পদক্ষেপসমূহৰ বিষয়েও উল্লেখ কৰে৷ জনপ্রিয় গায়িকা কল্পনা পাটোৱাৰীৰ যোগদানত অগপই ১০০ সিংহৰ বল পাইছে বুলি মন্তব্য কৰি অগপৰ সভাপতিগৰাকীয়ে তেওঁক সাংস্কৃতিক কোষৰ মুৰব্বীৰ দায়িত্ব দিয়া হ’ব বুলিও ঘোষণা কৰে৷ আজিৰ সভাত অতুল বৰাই ‘এশ সিংহৰ মৃত্যুৰ অন্তত জনম ইয়াতে মোৰ’ শীর্ষক এটা স্বৰচিত কবিতাও আবৃত্তি কৰে৷ ইফালে, বিজেপি এৰি অগপত যোগদান কৰা জনপ্রিয় গায়িকা কল্পনা পাটোৱাৰীয়ে কয় যে সমাজ, সংস্কৃতি আৰু ৰাজনীতি কোনো পৃথক বিষয় নহয়৷ ইটো–সিটোৰ লগত জড়িত৷ গতিকে ‘পলিটিক্স নকৰিবা বন্ধু’ বুলি কোৱাটো সঠিক নহয়৷ সাংবাদিকৰে হোৱা বার্তালাপত কল্পনা পাটোৱাৰীয়ে নিজৰ জন্মভূমি সৰভোগৰ পৰা নির্বাচন খেলাৰ ইচ্ছা ব্যক্ত কৰে যদিও এইক্ষেত্রত দুয়োটা মিত্রদলেহে চূড়ান্ত সিদ্ধান্ত ল’ব বুলি কয়৷ আজিৰ অনুষ্ঠানত অগপৰ কার্যকৰী সভাপতি কেশৱ মহন্ত, মন্ত্রী ফণীভূষণ চৌধুৰীকে ধৰি জ্যেষ্ঠ নেতাসকল উপস্থিত থাকে৷

error: Content is protected !!
%d bloggers like this: