fbpx
March 3, 2021

পৰীক্ষা নিদিলেও প্রথমৰ পৰা নৱম শ্রেণীলৈ উত্তীর্ণ হ’ব শিক্ষার্থী

গুৱাহাটীঃ ক’ৰোনা ভাইৰাছৰ সংক্রমণ আৰু দীঘলীয়া লকডাউনৰ বাবে ক্ষতিগ্রস্ত হোৱা শিক্ষার্থীক সকাহ দিবলৈ বিশেষ নির্দেশনা জাৰি কৰিছে ৰাজ্যৰ শিক্ষা বিভাগে৷ প্রথম শ্রেণীৰ পৰা নৱম শ্রেণীলৈ শিক্ষার্থীসকলক বছৰেকীয়া পৰীক্ষাত অৱতীর্ণ নহ’লেও পৰৱর্তী শ্রেণীলৈ উন্নীত কৰিবলৈ নির্দেশ দিছে সংশ্লিষ্ট বিভাগটোৱে৷ ৰাজ্যৰ শিক্ষা বিভাগৰ আয়ুক্ত সচিবে জাৰি কৰা এক নির্দেশনা অনুসৰি বছৰেকীয়া পৰীক্ষা বিদ্যালয়সমূহে অনুষ্ঠিত কৰাটো বাধ্যতামূলক নহ’ব৷

অৱশ্যে যিসমূহ বিদ্যালয়ে বছৰেকীয়া পৰীক্ষা অনুষ্ঠিত কৰিব বিচাৰে, সেইসমূহ শৈক্ষিক প্রতিষ্ঠানে অহা মার্চ মাহৰ প্রথম সপ্তাহত পৰীক্ষা অনুষ্ঠিত কৰিব পাৰিব৷ ক’ভিডৰ সংক্রমণৰ বাবে পাঠদান বন্ধ হৈ পৰা শৈক্ষিক প্রতিষ্ঠানসমূহৰ শিক্ষার্থীসকলৰ যাতে শৈক্ষিক বর্ষৰ লোকচান নহয়, তাৰ প্রতি লক্ষ্য ৰাখি এই নির্দেশনা জাৰি কৰিছে শিক্ষা বিভাগে৷ বছৰেকীয়া পৰীক্ষাত অৱতীর্ণ নহ’লেও পৰৱর্তী শ্রেণীলৈ শিক্ষার্থীসকলক উন্নীত কৰাৰ লগতে বিদ্যালয়সমূহে অহা ১ এপ্রিলৰ পৰা নতুন শিক্ষাবর্ষৰ পাঠদান আৰু অন্যান্য কাম–কাজ আৰম্ভ কৰিব লাগিব৷

শিক্ষা বিভাগৰ এই নির্দেশনা ৰাজ্যৰ ব্যক্তিগত শিক্ষানুষ্ঠানসমূহৰ ক্ষেত্রতো প্রযোজ্য হ’ব বুলি উল্লেখ কৰা হৈছে৷ উল্লেখ্য যে প্রাথমিক পর্যায় আৰু মাধ্যমিক পর্যায়ৰ নৱম শ্রেণীৰ বছৰেকীয়া পৰীক্ষা অনুষ্ঠিত কৰাক লৈ বিদ্যালয় কর্তৃপক্ষসমূহৰ মাজত বিভ্রান্তি সৃষ্টি হৈছিল৷

লকডাউনৰ বাবে ১ মার্চৰ পৰা যোৱা নৱেম্বৰ পর্যন্ত ৰাজ্যৰ শিক্ষানুষ্ঠানসমূহ বন্ধ হৈ পৰিছিল৷ পৰৱর্তী সময়ত অনলাইনযোগে পাঠদান আৰম্ভ কৰা হৈছিল যদিও সুবিধাৰ অভাৱত বহু শিক্ষার্থীয়ে এই অনলাইন শ্রেণীত পাঠদান গ্রহণ কৰিব পৰা নাছিল৷ ক’ভিডৰ সংক্রমণ হ্রাস পোৱাৰ পিছত বিদ্যালয়সমূহত পাঠদান আৰম্ভ কৰা হয় যদিও শিক্ষার্থীৰ উপস্থিতি বাধ্যতামূলক কৰা নাছিল৷ তদুপৰি বিদ্যালয়ত অভিভাৱকৰ সন্মতিসাপেক্ষেহে শিক্ষার্থীৰ উপস্থিতি নিশ্চিত কৰা হৈছিল৷

সেয়েহে বিদ্যালয় আৰম্ভ হোৱাৰ পিছতো সম্পূর্ণৰূপে স্বাভাৱিক হোৱা নাছিল শৈক্ষিক কাম–কাজ৷ ইপিনে ক’ভিডৰ সংক্রমণে ৰাজ্যৰ শৈক্ষিক ক্ষেত্রখনত সৃষ্টি কৰা অচলাৱস্থাৰ প্রতি লক্ষ্য ৰাখি ৰাজ্য চৰকাৰে বিদ্যালয়সমূহৰ শৈক্ষিক বর্ষ ৩১ মার্চৰ পৰা ১ এপ্রিল কৰাৰ সিদ্ধান্ত গ্রহণ কৰিছিল৷ এনে বিভিন্ন দিশসমূহ পর্যালোচনা কৰি শিক্ষা বিভাগে প্রথমৰ পৰা নৱম শ্রেণীলৈ বছৰেকীয়া পৰীক্ষাৰ ক্ষেত্রত এই বিশেষ সিদ্ধান্ত গ্রহণ কৰিছে৷

error: Content is protected !!